'Iki gika kirarangiye' – C. Ronaldo yaciye amarenga yo gusezera Al-Nassr

Cristiano Ronaldo yatangaje amakuru benshi bafashe nko gusezera ikipe ya Al-Nassr nubwo aho agiye kwerekeza kugeza ubu hatazwi, gusa yagaragaje ko gukina umupira byo abikomeza.

Hari hashize hafi isaha imwe mu ijoro ryacyeye atsindiye Al-Nassr igitego mu mukino wa nyuma wa shampiyona ya Saudi Pro League aho ikipe ye yatsinzwe na Al-Fateh 3 kuri 2.

Uyu mukinnyi w'imyaka 40 yanditse ubutumwa kuri X na Instagram aho yagize ati: "Iki gika kirarangiye", asa n'uvuga ko gukinira iyi kipe abishyizeho akadomo.

Yongeraho ati: "Inkuru? Yo iracyandikwa. Ndashimira byose."

Nubwo atavuze aho agiye kwerekeza, hari amakuru avuga ko ashakwa n'amakipe yo muri Major League Soccer muri Amerika, cyangwa ko ashobora kwerekeza mu ikipe yahereyemo ya Sporting iwabo muri Portugal.

Nta guhagarara ataragira 1,000

Ronaldo – wigeze kuvuga ko 'atazamanika inkweto' ataragera ku bitego 1,000 – byitezwe ko mu mpeshyi ije azaba ari umukinnyi wigurisha udafite amasezerano ayo ari yo yose.

Ni nyuma y'uko mu byumweru bishize ibiganiro n'ikipe ya Al-Nassr ku masezerano mashya binaniranye kugera ku kumvikana.

Al-Nassr yarangije iri ku mwanya wa gatatu inyuma ya Al-Ittihad yayirushije amanota 13, ibi bituma itazakina irushanwa rya Asian Champions League. Mu myaka ibiri n'igice amaze muri Al-Nassr ntiyabashije gutwara igikombe cya shampiyona.

Ronaldo ubu urimo gusatira ibitego 940, biraboneka neza ko ashaka gukomeza gukina, ariko aho azerekeza ntiharamenyekana. Buri kipe yakwifuza kumukinisha izi neza ko ari umukinnyi uhenze.

Ronaldo ni uwa mbere ku rutonde rushya rwa Forbes Magazine rw'abakinnyi binjiza amafaranga menshi ku isi mu mikino yose, inyuma ye haza Stephen Curry ukina basketball muri NBA.

Forbes ivuga ko Ronaldo - umaze kuza kuri uyu mwanya inshuro eshanu mu gihe cye nk'umukinnyi - ibyo yinjiza byavuye kuri miliyoni 15$ bigera kuri miliyoni 275$.

Ronaldo yagiye muri Al-Nassr mu Ukuboza(12) 2022 aho imari yinjizaga yiyongereye cyane kubera ibikorwa byo kwamamaza, no gukurikirwa n'abantu benshi cyane ku mbuga nkoranyambaga bose hamwe ubu bageze kuri miliyoni 939.

Harakurikiraho iki?

Mu cyumweru gishize perezida FIFA Gianni Infantino yatangaje ko "hari ibiganiro" kugira ngo Ronaldo azakine igikombe cy'isi cy'amakipe mu mpeshyi y'uyu mwaka.

Nyamara ikipe ye ya Al-Nassr ntabwo yabonye amahirwe yo kuba mu zizakina iri rushanwa rizabera muri Leta Zunze Ubumwe za Amerika.

Ronaldo watsindiye ikipe ya Al-Nassr ibitego 99 mu mikino 111 yose hamwe, agiye kujya mu kiruhuko yitegure umukino Portugal izakina n'Ubudage tariki 04 z'ukwezi gutaha mu irushanwa rya Nations League, ariko ikitezwe cyane ni inkuru y'ikipe azajya gukinamo nyuma y'aha.

Mu mpera z'icyumweru gishize ikinyamakuru Marca cyo muri Espagne cyanditse ko hari ikipe yo muri Brazil yamaze kubwira Ronaldo ko imushaka inamwereka ibyo yamuha.

Botafogo ni imwe mu makipe ane yo muri Brazil yabonye itike yo gukina kiriya gikombe cy'isi kandi umutoza wayo Renato Paiva ku cyumweru yabajijwe kuri Ronaldo.

Yarasetse, maze ati: "Aramutse aje, ntushobora guhakanira icyamamare nka kiriya.

"Nta kintu mbiziho – ndimo gusubiza ikibazo gusa. Ariko, nk'uko mbivuze, abatoza buri gihe bashaka [umukinnyi] mwiza. Ronaldo, no ku myaka ye, aracyari imashini itsinda ibitego. Mu ikipe ikeneye gutsinda, yaba mwiza."

Indi kipe yavuzwe mu makuru ko Ronaldo ashobora kwerekezamo ni Wydad Casablanca yo muri Maroc na yo iri mu makipe 32 azakina igikombe cy'isi ndetse byitezwe ko izahura na Manchester United hamwe na Juventus – amakipe yombi Ronaldo yaciyemo.

Andi makuru avuga ko ba nyiri ikipe ya Inter Miami bifuza kumuzana ku masezerano y'igihe gito agakinana na mukeba we w'igihe kinini Lionel Messi, gusa inzobere mu byo kugura no kugurisha abakinnyi zivuga ko Ronaldo nta mugambi afite wo kujya muri Inter Miami.