Trump avuga ko umubano we na Musk warangiye

Perezida w'Amerika Donald Trump yavuze ko umubano we na Elon Musk warangiye.

Ku wa gatandatu, Trump yabwiye televiziyo NBC News yo muri Amerika ati: "Yego, ni ko nabifata [ko warangiye]." Yari abajijwe niba atekereza ko umubano wa hafi w'abo bombi warangiye. Ubwo yari abajijwe niba yifuza gusana (kuzahura) uwo mubano wabo wangiritse, yasubije "Oya".

Ayo magambo ya Trump ni yo ya vuba aha cyane avuze kuva we na Musk bashwanye bikomeye bagacyocyorana ku mbuga nkoranyambaga.

Byabaye nyuma yuko Musk, umuherwe utunze za miliyari z'amadolari washoye imari mu ikoranabuhanga – wateye inkunga ibikorwa byo kwiyamamaza bya Trump ndetse nyuma akaza kuba umujyanama mu biro bya perezida w'Amerika (White House) – anenze ku mugaragaro umushinga w'itegeko wa Perezida Trump ujyanye n'imisoro n'ikoreshwa ry'amafaranga ya leta.

Uwo mushinga w'itegeko ni gahunda y'ingenzi y'igenamigambi muri politike ya Trump y'imbere mu gihugu.

Umubare munini w'abo mu ishyaka ry'abarepubulikani rya Trump bashyigikiye Perezida. Visi Perezida JD Vance yavuze ko Musk "yabaye kirimbuzi cyane" ndetse ko ashobora kutazongera na rimwe guhabwa ikaze mu muryango (w'abari hafi ya perezida).

Mu kiganiro na Theo Von utangaza ibiganiro kuri interineti mu buryo buzwi nka 'podcast', Vance yavuze ko Musk, umuyobozi nshingwabikorwa wa kompanyi Tesla na SpaceX, yakoze "ikosa rikomeye" ryo kwibasira perezida.

Mu gihe cy'ibyumweru, Musk yanenze itegeko rihatse ayandi rya Trump – ryiswe 'Big Beautiful Bill' – mu gihe ryagibwagaho impaka mu nteko ishingamategeko.

Yavuze ko mu gihe uwo mushinga w'itegeko waba wemejwe, wakongera tiriyari z'amadolari ku mwenda (ideni) w'igihugu ndetse ko uwo mushinga w'itegeko "wakwangiza" umurimo yakoze nk'umukuru w'urwego rwa DOGE rushinzwe kunoza imikorere y'inzego za leta, n'umuhate we wo kugabanya imari leta ikoresha.

Nyuma gato yo kuva muri urwo rwego rwa DOGE, aho yakoze iminsi 129, Musk yatangaje ku rubuga nkoranyambaga rwe X ko uwo mushinga w'itegeko ari "ishyano riteye ishozi" – ariko ntiyanenga Perezida Trump mu buryo butaziguye.

Ariko ku wa kane, Trump yabwiye abanyamakuru ko yumva yatengushywe n'imyitwarire ya Musk.

Musk yasubije akoresheje urukurikirane rw'ubutumwa yatangaje kuri X, avuga ko Trump yari kuba yaratsinzwe amatora iyo atamugira (iyo Musk atahaba), ashinja Trump kuba ari muri dosiye za Jeffrey Epstein, umunyemari wataye ikuzo wapfiriye muri kasho mu 2019, ubwo yari ategereje kuburanishwa ku birego byo gucuruza abantu mu buryo bwa magendu kugira ngo basambanywe ku gahato.

Musk yamaze gusiba ubwo butumwa ndetse umunyamategeko wa Epstein yahakanye ku mugaragaro ibyo birego ku wari umukiliya we.

Trump yasubirije ku rubuga nkoranyambaga rwe rwitwa 'Truth Social', avuga ko Musk "yasaze". Muri bumwe mu butumwa yatangaje, Trump yakangishije gusesa amakontaro Musk yagiranye na leta y'Amerika.

Mu kiganiro cyo ku wa gatandatu yagiranye na NBC News, Trump yavuze ko Musk "yasuzuguye ibiro bya perezida".

Trump yagize ati: "Ntekereza ko ari ikintu kibi cyane, kuko arasuzugura cyane. Ntushobora gusuzugura ibiro bya perezida."

Musk, umuherwe wa mbere ku isi, yatanze miliyoni hafi 250 z'amadolari nk'inkunga mu bikorwa bya Trump byo kwiyamamaza ku mwanya wa perezida.

Musk yumvikanishije, muri ubwo bushyamirane bwo ku mbuga nkoranyambaga, ko ashobora kuzashyigikira bamwe mu bazahangana na Trump mu matora yo mu mwaka utaha yo hagati muri manda (azwi nka 'midterm elections'), agashyigikira abazahangana n'abagize inteko ishingamategeko bashyigikiye uwo mushinga w'itegeko wa Trump ujyanye n'imisoro.

Ubwo Trump yari abajijwe muri icyo kiganiro ku kuba Musk ashobora kuzashyigikira abakandida bo mu ishyaka ry'abademokarate baba bahanganye n'abarepubulikani, Trump yavuze ko Musk byamuviramo "ingaruka zikomeye".