Нега Ғарб аёллари шиширилган кўкрак ва лаблардан воз кечмоқда?

32 ёшли украиналик блогер ва диетолог Катерина Крупкина ижтимоий тармоқларда кўкрак имплантларини олириб ташлагани ҳақида гапирганида, сўзлари шунчалик катта таъсир қилишини ҳеч кутмаган эди.

Унинг Instagram'даги видеоси 7.5 миллион марта кўрилган. Унинг айтишича, шундан кейин унга ўз имплантларини олдириб ташлашни ўйлаётган аёллардан "мингдан ортиқ" хабар келган.

"Каттароқ кўкраклар мени бахтлироқ, соғломроқ ёки гўзалроқ қилмаслигини тушундим," дейди у Би-би-сининг Украина хизматига. Бу қарорга у ёш қизи "кўкрагим онамники каби катта бўлишини хоҳлайман" деганидан сўнг келганини қўшимча қилди.

"Ўша лаҳзада мен қизимга нотўғри намуна бўлаётганимни англадим," дейди у.

Катерина ёлғиз эмас. Бутун дунёда кўкрак имплантларини олдириб ташлашни истаётган аёллар сони ортиб бормоқда. Лекин нима учун?

Сабаблар кўп

Эстетик пластик жарроҳларнинг дунёдаги етакчи профессионал ташкилоти – Халқаро эстетик пластик жарроҳлик жамияти маълумотлари кўрсатишича, кўкрак имплантларини олиб ташлаш, яъни "кўкрак эксплантацияси" 2019 йилдан бери 46.3 фоизга ошган.

Шу билан бирга, 1990-2000 йилларда косметик жарроҳликнинг асосий йўналиши бўлиб қолган кўкрак безларини катталаштириш шу даврда атиги 5.4 фоизга ўсган ва 2022 йилдан 2023 йилгача 13 фоизга камайган.

Мутахассислар фикрича, кўкрак имплантларини олиб ташлашнинг асосий сабаби эстетик ва косметикдир. Уларнинг айтишича, "кичикроқ, табиийроқ кўринадиган кўкраклар"га мойиллик пайдо бўлган.

"Аёллар 2025 йилда беш ёки ўн йил олдингига қараганда бошқача кўринишни хоҳлашмоқда," дейди Америка пластик жарроҳлар жамиятининг Ижтимоий медиа кичик қўмитаси раиси доктор Кристи Ҳамилтон.

"Биз 90 ва 2000 йилларда қўйган имплантлар одатда жуда катта эди. Ҳозирда имплант қўйилган аёллар ё ўлчамларини кичрайтирмоқда, ёки агар уларда бошиданоқ етарли табиий кўкрак тўқималари бўлса, имплантларни бутунлай олиб ташлаб, кўкракни кўтариш ва ҳажмнинг бир қисмини қайтариш учун ёғ кўчиртирмоқда," дея қўшимча қилади у ва "умуман олганда, кичикроқ кўкраклар урфга чиққанини" таъкидлайди.

Рио-де-Жанейродаги Бразилия пластик жарроҳлар ассоциацияси президенти доктор Бруно Ҳеркенҳофф ҳам бунга қўшилади.

"Баъзи беморлар энди ҳаддан ташқари катталаштирилган кўкракни истамаяпти," дейди у ва ҳозирда кўкрак имплантларини катталаштириш амалиётидан кўра кўпроқ олиб ташлаш амалиётини ўтказаётганини қўшимча қилади.

Яна бир омил шундаки, "баъзи аёллар келажакда имплантларни алмаштириш заруратини исташмайди," чунки имплантлар одатда 10-20 йил давом этади ва кейин жарроҳлик йўли билан олиб ташланиши ва алмаштирилиши керак бўлади.

Доктор Ҳеркенҳофф, шунингдек, кўкрак имплантлари касаллиги ва автоиммун реакциялар каби асоратлар ҳақида хабардорлик ортган. Шу боис баъзи аёллар имплантларини олиб ташлашга ёки умуман қўйдирмасликка қарор қилмоқда.

"Ҳозирда силикон касаллиги ва автоиммун реакциялар ҳақида кўпроқ маълумотлар бор. Организм силиконга реакция кўрсатиб, бўғимларда оғриқ, соч тўкилиши ва вазн ортиши каби аломатлар пайдо бўлиши мумкин."

Унинг айтишича, имплантлар билан боғлиқ баъзи саратонлар ҳам пайдо бўлиши мумкин.

"У имплант атрофидаги капсулада шаклланиши мумкин. Ташхис қўйилганда, одатда капсулани олиб ташлаш муаммони ҳал қилади."

"Бу жуда кам учрайдиган, аммо реал ҳолат," дея қўшимча қилади у.

Катеринада ўша имплантлардан бири бор эди ва унинг айтишича, имплантларини олиб ташлаш қарори "ўн баравар кучайган," ваҳоланки, ҳеч қандай тиббий текширувлар унинг саратон касаллигига чалинганини аниқламаган эди.

"Бироқ, менимча, бу аёлларнинг имплантларини олдириб ташлашининг асосий сабаби эмас. Менимча, бу кўпроқ эстетик диддаги ўзгариш," дейди доктор Ҳамилтон.

Унинг таъкидлашича, кўкрак имплантлари техникасидаги ўзгаришлар ҳам кўкрак имплантларини олиб ташлаш тенденциясини келтириб чиқариши мумкин.

Унинг айтишича, эски усулларда имплантлар мушак остига жойлаштирилган, бу эса одатий ҳаракатлар пайтида нотабиий кўринишга олиб келган.

"Эски имплантлари бўлган аёлларни кўрганингизда, бу кўпчилик учун катта муаммо эди – улар машқ қилаётганда, кимнидир қучоқлаётганда ёки ҳатто йога билан шуғулланаётганда имплантлари ён томонга силжиб кетарди."

Унинг айтишича, янги усуллар имплантларни мушак олдига жойлаштиради, бу эса шаклни табиийлаштиради.

Кенгроқ тренд

Иккала мутахассис ҳам табиий кўринишга интилиш кенгроқ тус олганини таъкидлайди.

"Бу юз, бурун, кўкрак ва бутун тана," дейди доктор Ҳамилтон.

Уларнинг айтишича, илгари тўлдирувчилар ва ботокс каби баъзи косметик муолажалардан ҳаддан ташқари кўп фойдаланиш нотабиий натижаларга олиб келган, бу эса беморларнинг қарашларини ўзгартиришга мажбур қилган.

"Ҳаммамиз жуда кўп тўлдирувчи ишлатилганда нотабиий кўринадиган мисолларни кўрганмиз," дейди доктор Ҳамилтон.

"Юзни гўзал қилиш уни бадбашара қилишга айланди. Кўпчиликнинг юзи бир хил бўлиб қолди. Энди беморлар муболағасиз, табиий кўринишни хоҳлашмоқда," дея қўшимча қилади доктор Ҳеркенҳофф.

Доктор Ҳамилтоннинг таъкидлашича, унинг кўплаб беморлари тўлдирувчилардан бутунлай воз кечмоқда, айниқса, янгилар.

"Илгари ушбу муолажани ўтказмаган кўплаб беморлар уларни синаб кўришга умуман қизиқмаяпти, чунки улар бу восита оқибатларини кўришган."

Унинг қўшимча қилишича, илгари тез-тез тўлдирувчи инъекциялари зарурлиги айтиларди, бу эса салбий натижа берган.

"Бизга: "О, ҳар уч-олти ойда тўлдирувчи қилиш керак", дейишганда, менимча, бу эстетика соҳаси томонидан йўл қўйилган хато эди... Бу одамлар борган сари ғалати кўрина бошлагани учун салбий натижа берди."

Натижада беморлар энди нозикроқ муолажаларга эътибор қаратмоқда, дейди у.

Оммалашаётган янги муолажалар орасида ортиқча ҳажмсиз тери сифатини яхшилайдиган коллаген стимуляцияси бор, дейди доктор Ҳеркенҳофф.

Коллаген организмда энг кўп учрайдиган оқсил бўлиб, суяклар, тери, мушаклар ва пайларда учрайди. Бироқ ёш улғайган сари унинг миқдори камайиб боради.

"Табиий" кўриниш реаллиги

Катерина кўкрак имплантларини олдиргандан сўнг, лабларини ҳам табиий ўлчамга келтирди ва ажинларни яшириш учун ботоксдан фойдаланишни тўхтатди.

"Мен ҳаракатларим трендга айланишини ва аёллар ўз ташқи кўринишига ортиқча эътибор бермаслигини орзу қиламан," дейди у.

Дунёнинг етакчи косметика компаниясининг юқори лавозимли вакили Би-би-сига саноат "табиий гўзаллик тенденцияси"га умид боғлаётганини тасдиқлади.

Бироқ, "бу гўзаллик маҳсулотларига камроқ пул сарфлаш ёки косметик муолажалардан воз кечиш дегани эмас, аксинча, қиёфани шундай сайқаллаш керакки, у табиий кўринсин ҳамда табиий хусусиятларни кучайтирсин," дейди улар.

2023 йилда глобал гўзаллик бозорида чакана савдо 446 миллиард долларгача ўсди, бу 2022 йилга нисбатан 10 фоизга кўп, дейилади McKinsey ҳисоботида Euromonitor бозор тадқиқотлари компанияси маълумотларига таяниб.

Манбанинг қўшимча қилишича: "Аёллар ҳали ҳам пардоз қилишмоқда, аммо "табиий кўриниш" дегани камроқ пардоз дегани эмас – бу силлиқ кўринишни сақлаб қолган ҳолда тоза тери иллюзиясини яратадиган маҳсулотлардан фойдаланишдир."

Тиббиёт мутахассислари таъкидлашича, табиий кўринишга ўтиш одамлар жарроҳлик ва ножарроҳлик косметик муолажалардан воз кечишини англатмайди.

"Биз шунчаки юзга ҳажм қўшиш ўрнига, энди таранглаштирадиган ва қайта шакллантирувчи муолажаларга эътибор қаратмоқдамиз," дейди доктор Ҳамилтон.

Халқаро эстетик пластик жарроҳлик жамияти статистик маълумотларига кўра, пластик жарроҳлар томонидан 2023 йилда дунё бўйлаб 15.8 миллион жарроҳлик амалиёти ўтказилган, бу 2022 йилга нисбатан 5.5 фоизга кўпдир. Жарроҳлик бўлмаган амалиётлар ҳам шу даврда қарийб 2 фоизга ошган.