'Ofn mynd mas i’r clos' ar ôl dioddef lladrad ar fferm

Mae cefn gwlad Cymru’n wynebu “ton” o ladradau ar ffermydd, yn ôl un undeb.

Dywed undeb NFU Mutual eu bod yn ymwybodol o hyd at 20 achos o ddwyn o ffermydd yng ngorllewin Cymru yn ystod y tri mis diwethaf.

Mae Mark Davies yn byw yng ngogledd Sir Benfro. Cafodd cwad ei ddwyn oddi ar ei fferm ar benwythnos Gŵyl y Banc ym mis Awst yn ystod oriau mân y bore.

Cafodd y lladrad ei gofnodi ar gamera cylch cyfyng yn y sied, ac roedd dau berson i'w gweld yn symud y beic lawr y ffordd.

“Oedd y plant ofn mynd mas i’r clos am sbel. Yn y Gwanwyn ni’n lloia ac wyna, ni mas tipyn ar y clos yn y tywyllwch. Chi’n ofni wedyn pwy sy’ rownd y lle,” meddai Mark Davies.

Ychwanegodd fod cwad newydd yn gallu costio hyd at £10,000.

“Ar bob ffarm mae’r beic yn cael ei ddefnyddio bob dydd trwy’r dydd. Os chi’n colli’r beic mae e fel colli’ch coes chi.”