/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Guto Harri: Anhapusrwydd Boris Johnson yn 'ddigon teg'

Mae'n "ddigon teg" i'r cyn-brif weinidog Boris Johnson deimlo'n anhapus gyda'r broses o ymchwilio i honiadau Partygate, yn ôl y Cymro a fu'n gyfarwyddwr cyfathrebu iddo.

Yn ddiweddarach yn yr wythnos, mae disgwyl i Bwyllgor Breintiau Tŷ'r Cyffredin gyhoeddi canfyddiadau'r ymchwiliad i honiadau bod Mr Johnson wedi camarwain y senedd.

Fe wnaeth Boris Johnson ymddiswyddo fel AS ddydd Gwener ar ôl gweld adroddiad yr ymchwiliad i bartïon honedig yn Downing Street.

Dywedodd ei fod wedi ei orfodi allan gan "lys cangarŵ".

Ddydd Llun, dywedodd un fu'n cydweithio â Mr Johnson yn Rhif 10, Guto Harri nad yw'n "edrych fel cyfundrefn deg iddo fe, a dwi'n cytuno".

Dywedodd y dylai proses all roi diwedd ar yrfa rhywun fod yn "fwy gwrthrychol" ac "uwchlaw y ffrae wleidyddol".

Ychwanegodd bod Mr Johnson wedi ymddiswyddo fel AS am ei fod yn gwybod "bod y gêm ar ben".

Camu i lawr "oedd yr opsiwn orau oedd ar gael", meddai.

Ychwanegodd nad oedd yn gweld llwybr yn ôl i Mr Johnson "yn y dyfodol agos, ond gydag e dy'ch chi byth yn gwybod".