/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Arestio dau yn dilyn ymladd mewn gêm bêl-droed

Clybiau pêl-droed Dinbych a Bangor 1876 yn "siomedig" ar ôl i wylwyr ddechrau ymladd yn ystod gêm rhwng y ddau dîm

Mae Heddlu Gogledd Cymru wedi cadarnhau fod dau berson wedi'u harestio yn dilyn ymladd mewn gêm bêl-droed nos Wener.

Cafodd ymchwiliad ei lansio yn dilyn y ffrwgwd mewn gêm rhwng Dinbych a Bangor 1876 ar frig cynghrair yr Ardal North West.

Dywedodd clwb Dinbych y byddan nhw'n lansio ymchwiliad eu hunain i'r digwyddiad, gyda Bangor hefyd yn nodi eu cefnogaeth.

Ond bellach mae wedi'i gadarnhau fod llanc 14 oed wedi ei gadw yn y ddalfa ar ôl cael ei arestio ar amheuaeth o gyflawni trosedd trefn gyhoeddus a thorri amodau ei fechnïaeth llys.

Cafodd dyn 19 oed o Lanelwy hefyd ei arestio ar amheuaeth o fod ag arf llafnog a chyffuriau Dosbarth A yn ei feddiant.

Cafodd ei ryddhau o dan ymchwiliad tra bod ymholiadau yn parhau, gyda'r heddlu yn parhau i apelio am dystion i gynorthwyo'r ymchwiliad.

Mewn datganiad ychwanegodd y llu: "Rydym wedi ymrwymo i ddod â phawb oedd yn ymwneud â'r anhrefn o flaen eu gwell, a byddwn yn gweithio'n agos gyda'r gymuned leol a'r ddau glwb pêl-droed i'r perwyl hwn."

Pynciau cysylltiedig

Straeon perthnasol