/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Cyhoeddi ysgol gynradd Gymraeg newydd ar gyfer Casnewydd

Ysgol Gynradd PillgwenlliGoogle

Er mwyn cefnogi'r cynnig, byddai Ysgol Gynradd Pillgwenlli yn symud i gyfleusterau newydd yn gynnar yn 2022

Mae Cyngor Dinas Casnewydd wedi cyhoeddi cynlluniau ar gyfer pedwaredd ysgol gynradd Gymraeg yn y ddinas.

Yn dilyn gwaith adnewyddu, bydd yr ysgol newydd yn cael ei sefydlu ar safle presennol Ysgol Gynradd Pilgwenlli ym mis Medi 2022.

Bydd bron £6 miliwn yn cael ei fuddsoddi yn yr ysgol Gymraeg newydd a dwy ysgol arall yng ngorllewin y ddinas.

Dywedodd arweinydd Cyngor Dinas Casnewydd, Debbie Wilcox: "Fe wnaethom ymrwymiad i ehangu a gwella'r cyfleoedd i gael addysg Gymraeg yng Nghasnewydd ac rydym yn cyflawni'r addewid hwnnw."

'Llawn cyffro'

Golygai'r ysgol newydd fod nifer y lleoedd mewn ysgolion cynradd Cymraeg ar draws y ddinas yn cynyddu 50%.

Mae'r ysgol newydd yn rhan o Gynllun Strategol Cymraeg mewn Addysg y cyngor sy'n cynnwys ymrwymiad i ehangu'r ddarpariaeth gynradd.

Ychwanegodd Ms Wilcox: "Rydym wedi gweld enghreifftiau o addysg Gymraeg ardderchog yng nghymunedau pobl dduon a lleiafrifoedd ethnig, megis yn Butetown, Caerdydd, ac rydw i'n llawn cyffro o fod yn datblygu hyn yng Nghasnewydd.

"Byddai ehangu Ysgol Gynradd Pilgwenlli hefyd yn amhrisiadwy o ran bodloni anghenion y gymuned leol a gwella addysg a phresenoldeb drwyddo draw."

Bydd gan yr ysgol newydd ar safle Pilgwenlli dau ddosbarth mynediad gydag uned drochi a chanolfan adnoddau dysgu.

Hefyd cynigir y bydd egin ysgol yn cael ei sefydlu o fis Medi 2020 yn yr adeilad babanod gwag yn Caerleon Lodge Hill.

Byddai arian hefyd yn cael ei fuddsoddi yn Ysgol Gynradd Parc Tredegar, gan ei chynyddu i ysgol â dau ddosbarth mynediad a hanner.

Cyn y gwneir penderfyniad terfynol ar y cynigion, caiff ymgynghoriad ffurfiol ei gynnal i alluogi'r holl bartïon â diddordeb wneud sylwadau arnynt.

Straeon perthnasol