/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Trafod sefydlu ardal gwella busnes newydd yn Y Rhyl

Y Rhyl
Gan Siôn Pennar
Gohebydd BBC Cymru

Gallai ardal gwella busnes (AGB) gael ei sefydlu yn Y Rhyl mewn ymgais i adfywio'r dref.

Mae yna eisoes 12 o ardaloedd o'r fath wedi eu sefydlu yng Nghymru - o Abertawe i Gaernarfon.

Busnesau sy'n ariannu'r ardaloedd gwella busnes drwy roi cyfraniad sydd gyfystyr â chanran fechan o'u trethi busnes.

Bydd cabinet Cyngor Sir Ddinbych yn trafod y fenter mewn cyfarfod ddydd Mawrth.

Hugh Evans

Yn ôl arweinydd y cyngor, bydd yr AGB yn gyfle i'r sector breifat "fuddsoddi" yn Y Rhyl

Yn ôl y cynlluniau, byddai AGB yn Y Rhyl yn codi £300,000 y flwyddyn dros y cyfnod cychwynnol o bum mlynedd y byddai'n weithredol.

Busnesau fyddai'n penderfynu at beth fyddai'r arian yn mynd.

'Cyfle i fuddsoddi'

Dywedodd Arweinydd Cyngor Sir Ddinbych, Hugh Evans, y byddai sefydlu AGB yn gyfle i'r sector breifat "fuddsoddi" yn Y Rhyl.

"Mae pawb yn gwybod bod ochr ariannol llywodraeth leol ddim yn mynd y ffordd iawn," meddai.

"Mae 'na lai o arian cyhoeddus yn mynd ymlaen, ac mae 'na gyfle i'r sector breifat fuddsoddi yn be' maen nhw'n teimlo sy'n addas."

Ychwanegodd y byddai'r AGB yn rhoi "gwerth ychwanegol" i'r hyn mae Cyngor Sir Ddinbych yn ei wneud.

Bydd cyfnod arall o ymgynghori os yw'r cabinet o blaid y prosiect, a bydd yn rhaid i fusnesau lleol hefyd roi sêl bendith i'r fenter mewn pleidlais cyn i'r AGB gael ei sefydlu.