'मुलगी इंजिनीअर बनावी म्हणून साठवलेले पैसे बुडाले', FIITJEE क्लासेस अचानक बंद झाल्याचा नेमका गोंधळ काय?

"मुलगी लहान होती तेव्हापासून 500-1000 रुपये जमा करत होतो. तिचं दहावी झाल्यानंतर तिला इंजिनिअर बनायचं स्वप्न होतं."

नागपुरातील आशीर्वाद नगर इथं राहणारे शेख फिरोज शेख सुभान यांच्या स्वप्नाला चांगलाच धक्का बसला. त्यांनी मुलीला जॉईंट एन्ट्रंस एक्झाम (JEE) च्या तयारीसाठी FIITJEE (फीटजी) कोचिंग सेंटरमध्ये प्रवेश घेतला होता.

महिन्याला अवघे 8 हजार कमावणारे शेख फिरोज शेख सुभान यांनी त्यासाठी 1 लाख 44 हजार रुपये भरले. पण काही महिन्यांतच कोचिंग सेंटर बंद झाल्यानं त्यांच्यासमोर संकट उभं राहिलं आहे.

आता फोन करतो तर कोणीही, उचलत नाही. आमचे पैसे बुडाले आणि मुलीचं नुकसानही झालं, असं ते बीबीसीबरोबर बोलताना म्हणाले.