सीरियाच्या सत्तेचे अनेक दावेदार, असद यांच्यानंतर कोणाच्या हाती येणार सत्ता

'इस्लामिक कट्टरतावाद्यांच्या हाती सीरियाची सत्ता आल्यामुळे ते चिंताग्रस्त आहेत.'

शनिवारी (7 डिसेंबर) संध्याकाळी दोहामध्ये अरब देशांचे परराष्ट्र मंत्री जमले होते. एका सूत्रानं त्यांच्या मन:स्थितीबद्दल हे वक्तव्य केलं होतं. सीरियामध्ये अराजकता निर्माण होऊ नये आणि हिंसाचाराचं सत्र सुरू होऊ नये, यावर चर्चा करण्यासाठी हे मंत्री जमले होते.

याच्या काही तासांनंतरच सीरियाचं सरकार उलथवून टाकणाऱ्या बंडखोरांच्या गटांचं नेतृत्व करणाऱ्या शक्तिशाली इस्लामिक गटानं जाहीर केलं होतं की बंडखोरांनी सीरियाच्या राजधानीवर नियंत्रण मिळवलं आहे.

हयात तहरीर अल-शाम (एचटीएस)चे नेते अबू मोहम्मद अल जुलानी यांनी 'दमास्कस ताब्यात' घेतल्याचं जाहीर केलं.

आता ते आपल्या टोपणनावाऐवजी अहमद अल-शारा या आपल्या खऱ्या नावाचा वापर करत आहेत. राष्ट्रीय पातळीवर त्यांची प्रतिमा उंचावल्याचं आणि ते मोठी भूमिका बजावत असल्याचं ते एक चिन्ह आहे.