/** * https://gist.github.com/samthor/64b114e4a4f539915a95b91ffd340acc */ (function() { var check = document.createElement('script'); if (!('noModule' in check) && 'onbeforeload' in check) { var = false; document.addEventListener('beforeload', function(e) { if (e.target === check) { = true; } else if (!e.target.hasAttribute('nomodule') || !) { return; } e.preventDefault(); }, true); check.type = 'module'; check.src = '.'; document.head.appendChild(check); check.remove(); } }());

Galw am wneud mwy i amddiffyn lleoliadau cerddorol Caerdydd

Owen Powell

Mae Owen Powell wedi bod yn perfformio yng Nghaerdydd ers yr 1980au

Megan Davies a Caitlin Parr
Gohebwyr BBC Cymru

Mae aelod un o fandiau enwocaf Cymru yn dweud bod angen gwneud mwy i amddiffyn rhai o leoliadau cerddoriaeth fyw y brifddinas.

"Dwi'n ofni bod Caerdydd yn mynd i'r cyfeiriad anghywir," meddai Owen Powell, cyn-aelod y band Catatonia.

Fe ddaw'r rhybudd wythnosau ar ôl i leoliad The Moon ar Stryd Womanby gau ei ddrysau am y tro olaf.

Yn ôl Cyngor Caerdydd mae strategaeth hir dymor yn ei lle i gefnogi, datblygu a hyrwyddo sector cerddorol y ddinas.

The Moon

Fe wnaeth The Moon yng Nghaerdydd gau ddiwedd 2024

Ers 2017 mae Caerdydd wedi bod yn gweithio tuag at statws 'dinas gerdd' fel rhan o ymgyrch i amddiffyn lleoliadau cerddorol y ddinas.

Ar y pryd fe ddywedodd un o Aelodau Seneddol y ddinas, Jo Stevens bod angen "creu lleoliadau newydd" wrth hefyd "edrych ar y lleoliadau sydd gennym ni, gan eu hamddiffyn a'u gwella".

'Angen platfform i Stereophonics y dyfodol'

"Mae dinas Caerdydd wastad wedi bod yn lle ffantastig i fandiau ifanc," meddai Owen Powell, sydd wedi bod yn perfformio yno ers yr 1980au.

Ei bryder nawr, meddai, yw bod yna ormod o ffocws ar ddigwyddiadau mawr sy'n denu miloedd i'r ddinas.

"Mae rhaid i ni gofio bod hynny yn grêt achos mae'n dod ag arian i economi'r ddinas.

"Ond beth dyw e ddim yn 'neud ydy rhoi platfform i'r bandiau ifanc - cenhedlaeth nesaf sy'n mynd i droi mewn i'r Stereophonics, y Manics, y Super Furry Animals."

Yn ôl Mr Powell, mae colli lleoliadau eraill megis Gwdihŵ, Buffalo a Ten Feet Tall dros y blynyddoedd diwethaf wedi achosi pryder.

"Mae 'na ddyfodol i'r bandiau achos ar hyn o bryd dwi'n clywed mwy o fandiau da yn dod allan o Gaerdydd ac o Gymru gyfan na dwi wedi ers 20 mlynedd," meddai.

"Ond os nag oes yna lwyfan iddyn nhw berfformio, beth sy'n mynd i ddigwydd iddyn nhw">