Gwylanod yn nythu yn atal trên rhag gadael Môn
- Cyhoeddwyd
Bu'n rhaid canslo trên o Gaergybi ddydd Llun gan fod gwylanod yn nythu ar drac reilffordd.
Roedd yn fwriad i symud trên gwag o Ynys Môn i safle cynnal a chadw yn Abertawe.
Ond pan gyrhaeddodd y criw, doedd dim modd symud y trên heb amharu ar nyth yr adar, sy'n rhywogaeth sy'n cael ei warchod.
Roedd pob trac posib arall wedi eu blocio, ac felly bu'n rhaid canslo'r daith.
Mae gwylanod wedi nythu rhwng y traciau yng Nghaergybi
Cerbyd dosbarth 175 yw'r trên dan sylw - math oedd yn cael ei ddefnyddio gan Drafnidiaeth Cymru tan 2023.
Roedd nifer ohonyn nhw'n cael eu cadw yng Nghaergybi cyn cael eu symud i weithfeydd Glandŵr yn Abertawe.
Dyma oedd y trên olaf i gael ei symud, ond roedd yn amhosib i hynny ddigwydd ddydd Llun gan fod yr adar yn nythu mor agos i'r trac.
Dywed Network Rail bod hi'n fwriad i aildrefnu'r daith gan ddefnyddio trac arall, fel bod y gwylanod yn cael llonydd i orffen nythu.
Dydy'r sefyllfa heb amharu ar deithiau arferol i ac o Gaergybi - dim ond taith y locomotif ar y dde gyda'r cerbyd dosbarth 175
Dywedodd llefarydd: “Nid oedd modd symud trên gwag o'r seidins yng ngorsaf Caergybi gan fod gwylanod yn nythu ar lein liniaru.
“Roedd yr uned i fod i deithio i Landŵr yn Abertawe ond mae'r gwylanod – rhywogaeth dan warchodaeth – yn nythu ar y trac.
“Roedd llwybr arall o Gaergybi wedi ei flocio gan drên arall, oedd heb griw, oherwydd doedd dim teithiau eraill wedi eu trefnu tan yn ddiweddarach yn y dydd.”