Dyn, 33, yn y llys ar gyhuddiad o lofruddio dynes yn Abertawe
Ymddangosodd Matthew Battenbough yn Llys Ynadon Abertawe ddydd Mercher
- Cyhoeddwyd
Mae dyn 33 oed wedi ymddangos o flaen llys wedi ei gyhuddo o lofruddio Leanne Williams yn Abertawe ddiwedd Chwefror.
Dim ond cadarnhau ei enw a'i ddyddiad geni wnaeth Matthew Battenbough mewn gwrandawiad yn llys ynadon y ddinas a barodd pum munud.
Cafwyd plismyn o hyd i Ms Williams, 47, yn ei chartref ar Ffordd Gomer yn Townhill am oddeutu 14:00 ddydd Iau 27 Chwefror.
Nododd archwiliad post-mortem bod ganddi anafiadau sylweddol i'w chorff.
Fe gafodd Mr Battenbough ei gadw yn y ddalfa ac mae disgwyl iddo ymddangos o flaen Llys y Goron Abertawe ddydd Iau.
Cafodd Leanne Williams ei chanfod yn farw ar 27 Chwefror
Cyn y gwrandawiad, dywedodd y Ditectif Uwcharolygydd Mark O'Shea: "Rydym yn dal i olrhain symudiadau diwethaf Leanne o 18:00 ddydd Llun, 24 Chwefror hyd at 14:20 ddydd Iau pan ddaeth swyddogion o hyd iddi.
"Gofynnir i unrhyw un sy'n byw neu sydd wedi teithio ar hyd Ffordd Gomer neu'r ardaloedd cyfagos yn ystod y cyfnod hwn wirio eu camerâu cylch cyfyng neu gamera dashfwrdd am unrhyw wybodaeth a allai fod yn berthnasol.
"Nid oes ots pa mor ddi-nod y gall y wybodaeth ymddangos. Rydym am glywed yn arbennig gan bobl a oedd yn adnabod Leanne ac nad ydynt wedi siarad â swyddogion eto."
Yn y cyfamser mae dyn 41 oed a gafodd ei arestio fel rhan o'r ymchwiliad wedi ei ryddhau.